Селекцияда мурдагы күйөөсү бетин кескилеген аял коомчулукка кайрылуу жасады (видео)

Бишкектин четиндеги Селекция айылында мурдагы күйөөсү тарабынан үрөй учурган зомбулукка кабылган 36 жаштагы Асел коомчулукка видео кайрылуу жасады.

Кайрылуусунда ал укук коргоо органдарына көп жолу кайрылганын, бирок үнү эч качан угулбай келгенин айтты.

"Мен Кыргызстанга келген күндөн баштап бул зөөкүр менин жанымды бир күн дагы койгон жок. Менин кайрылбаган жерим калган жок, канча арыз жаздым, канча укук коргоочуларга кайрылдым. Менин үнүм эч кимге жеткен жок, укугум корголгон жок", - деди ал кайрылуусунда.

Эске салсак, 20-сентябрда милиция Чүй облусунун Сокулук районундагы Селекция айылында аялын бычактоого шектелген 39 жаштагы жаранды кармаган. Шектүү аялынын мурдун, кулактарын кесип салган.

Чүй облустук милициясынын маалыматына караганда, бычакталып ооруканага түшкөн аял мурда күйөөсүнө каршы эки жолу арыз жазган.

Сокулук райондук сотунун чечиминин негизинде шектүү 20-ноябрга чейин камакка алынды.