Ош мэри Дүйнө чемпиону Акжол Махмудовго 500 миң сом тапшырды

Ош мэри Бакытбек Жетигенов Грек-рим күрөшү боюнча кыргызстандык балбан, Дүйнөнүн эки, Азиянын үч жолку чемпиону Акжол Махмудовду кабыл алып, Белград шаарында өткөн мелдештердеги жеңиши менен куттуктады. Бул тууралуу бүгүн, 13-октябрда Ош мэриясынан билдиришти.

Маалыматка ылайык, мэр Акжол Махмудовдун жараткан ийгиликтерин баса белгилеп, Ош шаарынын мэриясы тарабынан ага 500 миң сом, машыктыруучусу Майрамбек Ахмедовго 100 миң сом акчалай сыйлык тапшырды.

Белгилей кетсек, Махмудов Сербиянын Белград шаарында өткөн күрөш боюнча дүйнө чемпиондугунда финалда азербайжандык балбан Санан Сулейманов менен беттешип, жеңишке жеткен. Бул балбандын дүйнө чемпиондугунда уткан экинчи алтын медалы болду.

Өткөн жылдын сентябрь айында өткөн дүйнө чемпиондугунда венгриялык спортчу Золтан Леваини биринчи бөлүктө эле жеңип чемпион аталган.