"Сосновка" постунда жүк ташуучу унаалардын өтүүсүнө чектөө киргизилди

Бишкек-Ош унаа жолунун Төө-Ашуу ашуусунда жолду кардан тазалоо иштери тынымсыз жүрүүдө. Бул тууралуу бүгүн, 24-октябрда "Кыргызавтожол" мамлекеттик ишканасынан билдиришти.

Маалыматка ылайык, тазалоо иштери №9 Жол тейлөө ишканасы тарабынан жүргүзүлүүдө.

"Тыгындарды болтурбоо максатында аба ырайы жана климаттык шарттар жакшырганга чейин Бишкек - Ош унаа жолунун 81-чакырымында (Төө-Ашуу, Сосновка) чоң жүк ташуучу унаалардын өтүүсүнө убактылуу чектөөлөр киргизилди", - деп айтылат маалыматта.

Ишкана жолдордун ашуу тилкелерине бара жаткан айдоочуларга жайкы дөңгөлөктөрдү кышкы дөңгөлөккө алмаштырууну, дөңгөлөктөрдүн чынжырчаларын жана күрөктөрүн алып жүрүүнү сунуштайт.