"Тарбайтып койсок "лопух" болуп калат". Мирлан Самыйкожо желекти өзгөртүүгө каршы экенин айтты (видео)

Бүгүн, 25-октябрда Жогорку Кеңештин жыйынында депутат Мирлан Самыйкожо желекти өзгөртүүгө каршы экенин билдирди.

"Биз коомдо эмне болуп жатса ошону айтып турууга милдеттүүбүз. Мен жалкып калдым, бир нерсенин башы башталганда айтып калбасак бул жерге келгенде кечигип калат экенбиз. "Айткандын оозу жаман, ыйлагандын көзү жаман" болуп калат экенбиз.

Бүгүнкү күндө коомдо желегибизди өзгөртүү боюнча маселе көтөрүлүп жатат. Буга коомчулуктун дээрлик көпчүлүгү каршы болуп жатат. Биз желектен башка нерселерибизди эле жасайлычы. Биздин жакшынакай желегибиз - бул күндүн нуру. Биздин ата-бабаларыбыз ошол кезде эле үстүнөн караганды билиптир, дагы бир нерсеси коломто дегенди дагы түшүндүрөт. Бул оттун, жалындын, нурдун белгиси го. Биз арбайтып-тарбайтып койсок "лопух" болуп калат, кыргызчасы уйгак", - деди Самыйкожо.

Депутаттын бул сөзүнө төрага Нурланбек Шакиев дароо жооп берди.

"Ал жерде туу өзгөрбөйт, ал жерде эч кандай жаңы элементтер болбойт. Кечээ биз туунун авторлору менен дагы жолуктук, алар "Биз баштагы тууну тааныбай калдык" деп айтып жатышат. Түндүктүн кандай турганын өзүңүз көрүңүз, таптакыр башкача. Биз баштапкы калыбына алып келип коёлу деген эле максат", - деди Шакиев.