"ЭЛДИК КАБАРга" жооп: Баткенде оңдоо иштери бүтпөй жаткан тротуар боюнча мэрия жооп берди

Баткен шаарынын тургуну порталыбыздын ЭЛДИК КАБАР бөлүмүнө М.Салихов көчөсүнүн тротуары казылып, бир нече күндөн бери оңдолбой жатканын кабарлаган.

Буга байланыштуу Баткен шаарынын мэриясы аталган көчөдөгү жөө адамдар жүрүүчү жолдун казылышы жана коопсуздук эрежелеринин сакталбагандыгы тууралуу маалымат берди.

"Бүгүнкү күндө М.Салихов көчөсүндө “Кыргызтелеком” ААК Баткен облустук филиалы байланыш линиясын алып өтүү үчүн казуу иштерин жүргүзүп жатат. Буга чейин аталган мекеме Баткен шаарынын мэриясынан телефон байланышынын чубалгыларын жер астынан алып өтүүдө казуу иштерин жүргүзүүгө уруксат сурап кайрылган.

Баткен шаарынын мэриясы “Кыргызтелеком” ААКна казуу иштерин жүргүзүүдө коопсуздук эрежелерин сактоо жана жумуш аяктагандан соң жөө адамдар жүрүүчү жолду кайра калыбына келтирүү иштерин жүргүзүүнү милдеттендирген", - деп билдиришти мэриядан.