Жайыл районунда "Эл Аман" мамлекеттик дарыканасынын эки филиалы ачылды

Жайыл районунда мамлекеттик дарыкананын эки филиалы ачылды. Бул тууралуу Саламаттык сактоо министрлигинен билдиришти.

Маалыматка ылайык, мамлекеттик "Эл Аман" дарыканасынын филиалдары ҮМБнын («Кызыл» поликлиникасы) имаратында жана Жайыл районунун аймактык ооруканасынын аймагында орун алган.

"Көптөгөн лицензиясы жок башка жеке дарыканалар дары-дармектерди кымбат баада сатып, дарылардын жарактуулук мөөнөтүн сакташпайт, ал өз кезегинде адамдын ден соолугуна терс таасирин тийгизип, эч кандай пайдасы жок. Дарыканалар – коррупциялык схемалар менен күрөшүүнүн жолдорунун бири. Биз рейддерди жүргүзүп жатабыз, анын жыйынтыгында тиешелүү лицензиясы жок иштеп жаткан дарыканаларды аныктадык”, - деп билдирди саламаттык сактоо министри Алымкадыр Бейшеналиев.

Белгилей кетсек, өлкө аймагы боюнча жалпы 49 мамлекеттик дарыкана ачуу пландалган. Анда сапаттуу дары-дармектер жарактуулук мөөнөтүн эске алуу менен сатылат. Эң негизгиси, бүткүл Кыргызстан боюнча “Эл Аман” мамлекеттик дарыканаларында дары-дармектерге бирдиктүү баа базасы түзүлөрү белгилүү болгон.