Өзбекстан мунай көз карандысыздыгына жетүүгө ниеттенүүдө

Өзбекстан 2-3 жылда мунай көз карандысыздыгына жетүүнү мерчемдөөдө. Бул тууралуу аталган өлкөнүн президенти Шавкат Мирзиёев, 17-ноябрдагы жыйын учурунда билдиргенин чет элдик басылмалар жазып чыкты.

Маалыматка ылайык, өлкө башчысы Сурхандарыяда жалпы суммасы 3,3 миллиард долларды түзгөн төрт жаңы ири өнөр жай долбоору менен таанышып чыкты.

"Мен элибиз жакшы жашасын деп анын жүгүн жеңилдетүү үчүн абдан чоң максаттар жана так пландар менен быйыл Сурхандарыяга үчүнчү жолу келдим", - деген Мирзиёев.

Анын ичинде 2024-жылы ишке кирише турган Байсун газ-химиялык комплекси бар. Ал жерде жылына 5 миллиард кубометр газ тазалоо, жаратылыш газын жана күкүрттү өндүрүү пландалууда. Мындан тышкары өзбек бийлиги геологиялык чалгындоолорду кеңейтип, дагы 100 миллиард кубометрге жаңы газ запастарын ачып, 2-3 жыл аралыгында мунай көз карандысыздыгына толугу менен жетүүгө ниеттенүүдө.

"Ушул тапта бул комплексте 7 миң киши иштейт. Мирзиёевдин тапшырмасы менен комплексте кооперация түзүлүп, коңшу райондордун жашоочулары үчүн 2 миңден кем эмес жогорку кирешелүү жумуш орундары түзүлөт",- деп айтылат маалыматта.

Белгилей кетсек, 2024-жылы Казакстандын аймагы аркылуу Орусиядан Өзбекстанга мунай ташууну 1 миллион тоннага чейин көбөйтүү пландалууда. Бул ушул жылга салыштырмалуу үч эсеге көп.