Ош гарнизонунун аскер прокуратурасы тарабынан коррупцияга каршы күрөшүү боюнча түшүндүрүү иш-чаралары жүргүзүлдү

Кечээ, 11-декабрда Бириккен Улуттар Уюмунун башкы ассамблеясы тарабынан кабыл алынган Коррупцияга каршы күрөшүүнүн эл аралык күнүнө карата “Биз коррупцияга каршыбыз” аталышындагы тегерек стол жана семинарлар өткөрүлдү. Бул тууралуу Ош гарнизонунун аскер прокуратурасынан билдирди.

Маалыматка ылайык, Ош гарнизонунун аскер прокуратурасынын кызматкерлери тарабынан уюштурулган иш-чарага Коргоо министрлигинин, Өзгөчө кырдаалдар министрлигинин, Чек ара кызматынын аскер бөлүктөрүнүн жана мекемелеринин жетекчиликтери катышты. Анын алкагында коррупцияга каршы аракеттенүү жөнүндөгү ченемдик укуктук актылар белгиленип өттү.

"Мамлекетибизде жана коомубуздагы болуп жаткан коррупциялык жат көрүнүштөрдү, тактап айтканда опузалап пара алуу, пара берүү, кызмат абалын кыянаттык менен пайдалануу, бийликтен аша чабуу, мыйзамсыз баюу, ишенип берилген мүлктү ыйгарып алуу же коротуу жана башка кызматтык кылмыштар, анын мамлекеттин өнүгүшүнө жана коомго келип жаткан зыяндуу жактары боюнча кеңири форматта талкуулар жүрдү", - деп айтылат маалыматта.

Ошондой эле аскер кызматкерлеринин арасында корруциялык көрүнүштөргө мындан ары жол бербөө, алдын алуу, болтурбоо багытындагы иш аракеттерди күчөтүүнүн зарылдыгы белгиленди.