Бишкекте миң доллар пара алып жаткан жеринен эки мамлекеттик кызматкер кармалды (фото)

Опузалап пара талап кылып, аны алып жаткан жеринен Ленин районунун башкы архитектору жана Мамлекеттик картографиянын экономикалык бөлүгү боюнча бөлүмүнүн башчысы кармалды. Бул тууралуу УКМК кабарлады.

22-январда Бишкек шаарынын аймагынан миң доллар өлчөмүндөгү акча каражатын алып жаткан жеринен Бишкек шаарынын Ленин районунун башкы архитектору А.Н.М. жана Жер ресурстары боюнча мамлекеттик агенттигинин алдындагы Мамлекеттик картографиянын экономикалык бөлүгү боюнча бөлүмүнүн башчысы М.Ж.А. кармалган.

"Жүргүзүлгөн иш-чаралардын жүрүшүндө Ленин районунун башкы архитектору А.Н.М. аффилирленген жактар аркылуу коммерциялык объектилерди бузуу шылтоосу менен ар бир объектиге 2-3 миң доллар өлчөмүндө акча каражатын талап кылгандыгы аныкталды. Учурда кармалгандардын катышуусунда жүргүзүлгөн ыкчам-иликтөө иш-чараларынын алкагында тиешелүү тергөө амалдары жүргүзүлүп, башка кызмат адамдарынын бул коррупциялык схемага катышуусу бар экендиги аныкталууда", - деп билдиришти УКМКдан.