УКМКнын "Калкан" спецназынын командасы Дубайда ийгиликтерди багындырды (видео)

УКМКнын "Калкан" 9-атайын кошуунунун командасы "The UAE Swat Challenge 2024" атайын бөлүкчөлөрүнүн арасындагы эл аралык мелдеште жалпы командалык эсепте ардактуу 4-орунду, ал эми жеке машыгууларда "Калкан" күчтөрү беш жолку мүмкүнчүлүктө үч жолу 2-орунду ээледи. Бул тууралуу аталган мекемеден билдиришти.

Маалымдалгандай, Бириккен Араб Эмираттарынын Дубай шаарында болуп өткөн эл аралык мелдешке 40тан ашуун өлкөнүн, 70тен ашуун командасы катышып, анда УКМКнын "Калкан" 9-атайын бөлүкчөлөрүнүн командасы алдыңкы тайпалардын бири катары 4-орунга ээ болду.

Ага ылайык, 3-7-февраль күндөрү болуп өткөн эл аралык сынак атайын даярдыктагы аскерлерге өз өнөрүн, кесипкөйлүгүн жана достук мамилесин көрсөтүүгө мүмкүнчүлүк түздү.

"Мелдештин биринчи күнүнөн тарта “Калкан” атайын күчтөрүнүн командасы эң татаал кырдаалдарда мыкты чеберчиликти, укмуштуудай күчтү, тартипти жана тапкычтыкты көрсөтүштү. Тайпанын ар бир мүчөсү ийгиликке жетүү үчүн бардык күч-аракетин жумшап, дүйнөнүн төрт бурчунан келген командалардын курч атаандаштыгына карабастан, жеңиштин жолунда турган бардык кыйынчылыкты жеңип чыга алды",-деп айтылат маалыматта.

Белгилей кетсек, 2023-жылы “Калкан” спецназынын командасы жалпы командалык таймашта 8-орунга ээ болсо, жеке машыгуулардын биринде 3-орунга ээ болгон.