ИИМ: "Айдоочулук күбөлүктү интернеттен сатып алуу мыйзам боюнча жазаланат"

Ички иштер министрлиги айдоочулук күбөлүктү интернеттен сатып алгандарга мыйзам боюнча жаза бар экенин эскертет. Бул тууралуу министрлик бүгүн, 14-февралда маалымат таратты.

Маалыматка ылайык, социалдык түйүндөрдө айдоочулук күбөлүктү тез жана арзан баада жасап берүү тууралуу жарнамалар кездешүүдө.

Министрлик жасалма айдоочулук күбөлүктөр маалымат базаларында жок болгондуктан, жасалманы оңой эле аныктоого болорун кошумчалашты.

"Биринчиден, мындай документтер "Унаа" МИнын базасында катталбайт жана “Түндүк” тиркемесинен чыкпайт, демек, алардын "аныктыгы" биринчи текшерүүдө эле билинет. Экинчиден, түпнуска документтерде жасалмада жок болгон коргоо белгилери бар.
"Жасалма күбөлүктөр" бланктары даярдалган чыныгы серияга ээ болсо да, натыйжа өзгөрбөйт - эртеби-кечпи жасалма документтер жол кыймылынын коопсуздугун камсыздоо кызматкерлери тарабынан аныкталат.

Жасалма айдоочулук күбөлүктөрдү даярдоо кызматтарына кайрылаардан мурун, сизде учурдагы көйгөйлөрдү чечкенге караганда, көптөгөн жаңы көйгөйлөрдү жаратып калуу коркунучу бар деп ойлоңуз" деп айтылат маалыматта.

ИИМ укуктарды берген расмий документти жасалмалоо, анын анык мазмунун бурмалаган расмий документке атайылап жалган маалыматтарды же оңдоолорду киргизүү, аны даярдоочунун өзү же башка адам тарабынан пайдалануу, мындай документти сатуу, ошондой эле жасалма мөөрлөрдү же мамлекеттик сыйлыктарды даярдоо Кылмыш-жаза кодексинин "Документтердин жасалмасын жасоо" 379-беренесине ылайык 2 жылдан 5 жылга чейинки мөөнөткө эркиндигинен ажыратууга жазаланарын эскертет. Ал эми атайылап жасалма расмий документти пайдалангандыгы үчүн - эки жылдан беш жылга чейинки мөөнөткө эркиндигинен ажыратууга жазаланат.