Балбак Түлөбаев Нурзат Токтосунованын кыз узатуу тоюнда салават айтканы боюнча үн катты

Жогорку Кеңештин депутаты Балбак Түлөбаев алып баруучу Нурзат Токтосунованын кыз узатуу тоюнда салават айтканы боюнча пикирин билдирди. Бул тууралуу эл өкүлү бүгүн, 2-мартта социалдык тармактагы баракчасына жазды.

"Нурзат Токтосунова айым, азаматсыз! Алдыга жыла бериңиз. Эл ар кандай пикирде болот, ага терикпеңиз. Той ээси кааласа жар-жар айттырат, кааласа салават айттырат. Сиз азамат айымсыз. Сизге баракелде! Өтө терең сыйлайм. Ушакчы, жалакор, бир өңчөй пикирдеги адамдарды ээрчибеңиз. Коом сөзсүз алдыга жылат. Бири-бирибизди сыйлаганды үйрөнөбүз. Мен сиздин жаныңыздамын", - деп жазды Түлөбаев.

Нурзат Токтосунова 26-февралда алгачкы жолу антрактсыз, бийсиз той алып барганын жарыя кылган. Ошондой эле "Нур кыздар" салават группасын ачканын, мындан ары алар тойлордо "салават" айтарын кошумчалаган.

Алып баруучунун кыз узатууда салават айтуу демилгеси сынга кабылган. Социалдык тармактын колдоонуучулары Нурзат Токтосунова арабдардын идеологиясын, салтын алып келип, кыргыздын тарыхын, салтын жана маданиятын талкалап жатканын айтышкан.

Токтосунова өзүн сындагандарга жооп берип, бирөөнү жамандагандан көрө ар бир жаранды өлкөнү көтөрүүгө, улуттук баалуулуктарды жайылтууга чакырган.