Кантта тергөөчү сабалып, жаагы сынган. Милиция үч адамды кармады

Кант шаарында милиция кызматкерин сабоого шектүүлөр кармалышты. Бул тууралуу Чүй облустук ички иштер башкы башкармалыгынын басма сөз кызматы билдирди.

Билдирүүгө ылайык, 14-апрель күнү саат 4:00 чамасында Кант шаарынын Гагарин жана Зубков көчөлөрүнүн кесилишинен болжол менен 30-35 жаштар чамасындагы азиат түспөлүндөгү белгисиз адамдар 1991-жылы туулган К.Р. аттуу жарандын денесине себепсиз залал келтирген. Анын кесепетинен жабырлануучу ээгинин астыңкы жаак сөөгүнүн ачык сыныгы диагнозу менен республикалык оорукананын жаак-бет хирургия бөлүмүнө жаткырылган.

Бул факты боюнча Кылмыш-жаза кодексинин 280-беренесинин (Бейбаштык) негизинде кылмыш иши козголгон. Жабыркаган жаран Ысык-Ата районунун ички иштер башкармалыгынын тергөө кызматынын тергөөчүсү болгон.

Иликтөө иштеринин жүрүшүндө бул кылмышка шектүү катары үч адам, 1989-жылы туулган Д.А., 1991-жылы туулган И.Т. жана 1989-жылы туулган Э.У. аттуу жарандар кармалышып, убактылуу кармоочу жайга киргизилишти.

Учурда тергөө иштери уланууда.