Жогорку Кеңеш башкы прокурордун отчётун канааттандырарлык деп тапты

Бүгүн, 17-апрелде Жогорку Кеңештин жыйынында депутаттар 2023-жылы өлкөдө мыйзамдуулуктун абалы жөнүндө жана аны чыңдоо боюнча прокуратура органдары тарабынан аткарылган иштер тууралуу башкы прокурордун отчётун укту.

Жыйында депутаттардын суроолоруна башкы прокурор Курманкул Зулушев жана башка тиешелүү укук коргоо органдарынын өкүлдөрү жооп беришти.

Депутат Акылбек Түмөнбаев Казакстанда кармалып, соттолгон кыргызстандык ишкер Эрмек Маркабаевди экстрадициялоо маселесине токтолуп, анын качан алынып келинерин тактады. Башкы прокурор Курманкул Зулушев бул маселе жеке көзөмөлүндө экенин айтты.

Депутат Миргүл Темирбаева президенттин жарлыгына карабай билим берүү мекемелеринде негизсиз акча чогултуулар токтобой жатканын белгилеп, бул көрүнүштөргө башкы прокурорду көңүл бурууга чакырды.

Ал эми эл өкүлдөрү Камила Талиева менен Нилуфар Алимжанова ооруканаларда балдардын массалык түрдө ВИЧ инфекциясын жуктуруп алганы боюнча компенсация төлөп берүү жана кылмыш иштерин жандандыруу маселесин көтөрүштү. Депутат Эльвира Сурабалдиева "Бишкекасфальтсервис" ишканасына 4 жыл мурда козголгон кылмыш ишинин жыйынтыгына кызыгып, аны көзөмөлдөөгө чакырды.

Жыйынтыгында депутаттар башкы прокурордун отчётун канааттандырарлык деп тапты.