Баткендеги Ак-Суу каналы курулса 100гө жакын гектар жер өздөштүрүлөт

Өзгөчө кырдаалдар министри Бообек Ажикеев Баткенге болгон иш сапарынын алкагында Ак-Суу айыл өкмөтүнүн Ак-Суу каналынын курулушу менен таанышты. Бул тууралуу ӨКМден билдиришти.

Маалымдалгандай, 2500 метр узундуктагы аталган каналдын курулушу бүткөрүлсө, Жеңиш, Ак-Суу айылдары жана эгин аянттары сел коркунучунан корголот. Мындан сырткары кошумча 95 гектар жер аянты өздөштүрүлмөкчү. Учурда бул долбоордун курулуш иштеринин алгачкы этабы башталып, техникалар иштеп жатат.

Ага ылайык, министр Сүлүктү шаардык өзгөчө кырдаалдар бөлүмүндөгү авариялык абалда турган имаратты көрүп чыгып, шаар мэри Болот Абдыжапаровго имаратты куруу демилгесин көтөрүү жана башка тапшырмаларды аткаруу боюнча сунуштарды берди.

Андан аркы жолугушуу Тоо кырсыгынан куткаруу кызматынын Сүлүктү шаарындагы взводунда болуп, куткаруучулардын иштөө шарты жана техникалык каражаттары менен таанышты.