Депутат Акаев окуучуларды массалык иш-чараларга тартуулар көбөйгөнүн айтты

Бүгүн, 16-майдагы Жогорку Кеңештин жыйынында депутат Жанар Акаев балдарга карата жасалып жаткан зомбулуктар көп болуп жатканын, ошондой эле окуучуларды массалык иш-чараларга тартуулар тыйылбаганын айтып, өкмөттү тийиштүү чараларды көрүүгө чакырды.

Анын айтымында, акыркы убактарда балдарга байланыштуу жаман жаңылыктар көп болуп жатат.

"Акыркы жумадагы эле жаңылыктарды карап көрөлү. 3 жашар Наргиза деген кызыбыз сабалды, азыр ооруканада. Нарын дарыясына жаш балдар чөгүп кетти деген жаңылыктар. Балдар жөнүндө абдан көп өкүнүчтүү, кейиштүү жаңылыктар чыгып жатат. Мына 2 жаштагы Игорь деген баланы сабаган адам соттун 2 инстанциясы менен 5 жылга соттолгонуна карабастан Жогоку Соттон ал үй камагына чыгып кетти. Ал баланы аёосуз сабаган, керек болсо жыныстык мүчөсүн кескилеген. Бул адам бүгүн эркиндикте. Урматтуу аткаруу бийлигинин өкүлдөрү, биз балдарга болгон мамилени түп тамырынан өзгөртүшүбүз керек", - деди Акаев.

Мындан тышкары депутат окуучулар мамлекеттик кызматкерлерди тосуп алуу иш-чараларына тартылып жатканын белгиледи.

"Балдарды декорация катары колдонуп, чиновниктерди тосуп алган иш-чаралардын бардыгын сүрөткө, видеого тартып чыгарыш керек. Буга таптакыр жол берилбеш керек. Кыш ызгаарында дагы гүлдү карматып, көйнөкчөн коюп коюшат. Керек болсо массалык, маданий иш-чараларда туруп, эси ооп кулаган балдар дагы бар. Буга Министрлер кабинети системдүү, радикалдуу чечимдерге барышы керек деп ойлойм", - дейт эл өкүлү.

Ошондой эле Жанар Акаев ооруга чалдыккан балдар дагы көбөйүп жатканын кошумчалады.