Оштогу мектептерде билим берүүдө Япониянын ыкмасы киргизилет

Ош шаарындагы беш мектепте япониялык адистер тарабынан математика боюнча жаңы билим берүү ыкмаларын киргизүү боюнча изилдөөлөр жүргүзүлөт. Бул тууралуу Ош мэриясынан билдиришти.

Маалымдалгандай, мекеменин социалдык өнүктүрүү бөлүмүнүн башчысы Нурлан Закиров Япониянын Эл аралык кызматташтык агенттигинин (мындан ары JICA) өкүлү Мория Масахиро менен жолугушту.

“Долбоорду ишке ашырууга Ош мэриясы тарабынан колдоо көрсөтүлөрү айтылып, математика сабагы боюнча мугалимдердин билимин жогорулатууга багытталган семинарларды өткөрүү, окуучулардын дараметин аныктоо үчүн япониялык изилдөө тобунун мүчөлөрү тарабынан сабактарга байкоо жүргүзүү боюнча макулдашылды", - деп айтылат маалыматта.

Ал эми изилдөөнүн максаты – Ош шаарындагы 5 мектептин башталгыч класстарынын окуучуларынын билим деңгээлин текшерүү, мүмкүнчүлүгүн баалоо болуп саналат.

Ага ылайык, изилдөө башталгыч класстын окуучуларынын логикалык ой жүгүртүүсүн жогорулатууга, мугалимдерге математика боюнча жаңы ыкмаларды үйрөнүүгө мүмкүнчүлүк берет.