"Манас" аэропортунда Инчхон-Бишкек-Загреб багыты боюнча алгачкы транзиттик каттам аткарылды (сүрөт)

Кечээ, 16-майдан тарта T’way Airlines авиакомпаниясы Инчхондон (Түштүк Кореяга) Загреб шаарына (Хорватияга) багыт алып – "Манас" эл аралык аэропортуна жүргүнчүлөрү менен транзиттик каттам аткарды. Бул тууралуу "Манас" аэропортунан билдиришти.

Маалым болгондой, T’way Airlines авиакомпаниясы аэропортко конуп, учакты май менен камсыздады. T'way Airlines транзиттик каттамдары жумасына үч жолу аткарылат.

Ага ылайык, "Манас" аэропортунда май куюу учурунда 350 жүргүнчү кафелердин, дүкөндөрдүн кызматтарынан жана "Манас" аэропортунун башка артыкчылыктарынан пайдаланып, терминалдын ыңгайлуу шарттарында эки саатка чейин убакыт өткөрүүгө мүмкүнчүлүк алышат.

"Бул кадам "Манас" эл аралык аэропортунун кадыр-баркын көтөрүп, жаңы жүргүнчүлөрдү тартуу менен Кыргызстанды дүйнөнүн бардык туристтери үчүн жеткиликтүү кылат. Биргелешкен күч-аракеттер менен биз жаңы бийиктиктерди багындырып, Кыргызстан менен Түштүк Кореянын ортосундагы экономикалык жана маданий байланыштарды чыңдоого салым кошо алабыз деп ишенем", - деди "Манас" аэропортунун төрагасы Манасбек Самидинов.