Аскат Алагөзов "Эркин Европа/Азаттык" радиосунун вице-президенти менен жолукту

Бүгүн, 17-майда президенттин басма сөз катчысы Аскат Алагөзов Кыргызстанга сапар менен келген “Эркин Европа/Азаттык радиосунун” жаңы дайындалган вице-президенти Никола Карим менен жолугушту. Бул тууралуу Алагөзов өзү Фейсбуктагы баракчасы аркылуу билдирди.

Маалым болгондой, жолугушууда өлкөдөгү ЖМКга тиешелүү актуалдуу маселелер тууралуу сөз болду.

Мындан тышкары мамлекет башчы Садыр Жапаров ЖМКнын коомдун турмушундагы маанилүүлүгүн ар дайым белгилеп келери айтылды.

Ага ылайык, өлкөнүн мыйзамдарын сактоонун маанилүүлүгү талкууланды. Окуяларды тең салмактуу чагылдыруу, анын ичинде коомчулук үчүн позитивдүү жаңылыктардын үлүшүн жогорулатуу зарылдыгына өзгөчө көңүл бурулду.

"Жолугушууга “Эркин Европа/Азаттык” радиосунун Борбор Азия кызматтарынын башчысы Хамид Исмаилов, “Эркин Европа/Азаттык” радиосунун кыргыз кызматынын директору Венера Жуматаева, “Эркин Европа/Азаттык” радиосунун кыргыз кызматынын Бишкек бюросунун башчысы Бакытбек Асанов да катышты", - деп жазды Алагөзов.