Чүйдө мыйзамсыз менчиктештирилген бала бакча мамлекетке кайтарылды

Чүйдүн Биримдик айыл өкмөтүнө караштуу Искра айылынын Фабричная көчөсүндө жайгашкан бала бакчанын имараты 2006-жылдан баштап 4 жолу колдон колго өтүп сатылып, менчиктештирилип кеткендиги аныкталды. Бул туурасында Башкы прокуратурадан кабарлады.

Маалымдалгандай, Чүй райондук прокуратурасы тарабынан “Мүлккө муниципалдык менчик жөнүндө” мыйзамынын талаптарын аткарылышы боюнча текшерүү жүргүзүлгөн.

“Райондук прокуратура тарабынан сатуу-сатып алуу келишимдерин жокко чыгаруу максатында сот органдарына доо арыз келтирилип, кароонун жыйынтыгында толук канааттандырылган. Аталган жер тилкени мамлекетке кайтаруу максатында, айыл өкмөт башчынын наамына прокурордук чара көрүү актысы келтирилип, натыйжада наркы 11 миллион 292 миң 300 сомду түзгөн бала бакчанын имараты тийиштүү жер тилкеси менен Биримдик айыл өкмөтүнүн балансына алынды”, - деп белгиленген маалыматта.