Бишкектеги окуя: Жабыркагандардын абалы тууралуу маалымат берилди

41 жабырлануучу медициналык жардам алууга кайрылган. Бул тууралуу бүгүн, 20-майда Саламаттыкты сактоо министрлигинен билдиришти.

Маалыматка ылайык, учурда анын ичинен 11 бейтап ооруканада дарыланууда. Ал эми Шаардык тез жардам ооруканасында эки бейтап жатат. Алардын бирине жабык баш мээ жаракаты диагнозу коюлган. Экинчи жабырлануучунун жамбаш сөөгү сынган. Бейтаптардын абалы туруктуу деп бааланууда.

Ошондой эле Улуттук госпиталдын жаак-бет хирургия бөлүмүндө бир жабырлануучу дарылануусун улантууда, абалы салыштырмалуу канааттандырарлык деп бааланууда.

Кошумчалай кетсек, 19-майда дагы 8 чет элдик жаран медициналык жардам алууга кайрылып, Эл аралык медициналык университеттин клиникасына жаткырылган.

Ага кошумчалай, саламаттыкты сактоо министри Алымкадыр Бейшеналиев клиникага барып, алардын ден соолугунун абалы менен таанышты.

Өз сөзүндө министр жабыркагандарга квалификациялуу медициналык жардам көрсөтүү анын жеке көзөмөлүндө экенин баса белгиледи.

"Мамлекет башчы Садыр Жапаровдун тапшырмасы менен жабыркагандарды дарылоо жана керектүү дары-дармек менен камсыз кылуу боюнча бардык чыгымдар акысыз болот", - деп кошумчалады министр.

Эске салсак, 13-май күнү кечинде Бишкектин чыгыш тарабындагы жатаканалардын биринде жергиликтүү тургундарды чет элдик жарандар сабап жаткандагы видео тараган. Ага байланыштуу 17-майда жатаканадан анча алыс эмес жайгашкан Чүй-Курманжан датка көчөлөрүнүн кесилишине жакын жерде чогулган эл чет элдиктерди жоопко тартууну талап кылышкан.