Бишкектин Жал кичи районундагы миллиард сомдук жер мамлекетке кайтарылды

Бишкек шаарында баасы 1 миллиард сомдон ашык болгон 2 жарым гектар жер аянты мамлекетке кайтарылды. Бул тууралуу УКМК кабарлады.

"Бишкек шаарынын Тыналиев көчөсүндө жайгашкан 2,5 гектар жер тилкеси орто мектепти долбоорлоо жана куруу үчүн убактылуу пайдаланууга берилген. Андан соң аталган жер тилкеси Бишкек шаардык мэриясынын кызматкерлери менен алдын ала макулдашуудан кийин, 2011-жылы аукцион аркылуу 340 миң долларга жеке менчикке алынган. Анткен менен аталган участоктун ошол кездеги иш жүзүндөгү базар баасы 2 миллион долларды түзгөн.

Мындан тышкары жер тилкесинин баштапкы багыты социалдык мааниге ээ экендиги аныкталып, ал соода борбору бар көп кабаттуу турак жай комплексин куруу үчүн өзгөртүлгөн", - деп билдиришти УКМКдан.

Ыкчам иликтөө иш-чараларынын жүрүшүндө жер тилкесинин ээси аталган участокту мамлекеттин балансына өз ыктыяры менен акысыз өткөрүп берген.

Учурда ушул сыяктуу фактыларды жана тиешеси бар кызмат адамдарын аныктоо боюнча тергөө жана ыкчам издөө иш-чаралары жүргүзүлүүдө.