Украина Орусиянын жаңы үлгүдөгү Су-57 истребителин биринчи жолу жок кылганын билдирди

Кечээ, 9-июнда Украина аскерлери фронт сызыгынан 600 чакырымдай алыстыктагы базада орусиялык ультразаманбап Су-57 согуштук учагын жок кылганын билдирди. Бул тууралуу Euronews билдирди.

Украинанын Коргоо министрлигинин Башкы чалгындоо башкармалыгы кол салуунун кесепеттерин көрсөткөн спутник сүрөттөрүн бөлүштү. Эгер бул ырасталса, бул Киевдин Москва эң алдыңкы аскердик учак деп тааныган Су-57 истребителине биринчи ийгиликтүү соккусу болот.

Сүрөттөрдүн биринде учактын айланасындагы бетон тилкесинде кара көөнүн издери көрсөтүлгөн. Башкы чалгындоо башкармалыгынын маалыматы боюнча, чабуул ишемби күнү Орусиянын түштүгүндөгү Ахтубинск шаарындагы базада, фронт сызыгынан 589 чакырымдай алыстыкта ​​болгон.

Сокку АКШ менен Германия жакында эле Киевге жеткирген алыс аралыкка атуучу куралдары менен Орусиянын аймагындагы айрым буталарды атууга уруксат бергенден кийин жасалган.