Эрдоган Сирия менен болгон мамилени калыбына келтирүү ниетин билдирди

Түркия Сирия менен 2011-жылы үзүлгөн мамилесин калыбына келтирүүгө ниеттенип жатканын чет элдик басылмалар жазып чыгышты.

Маалыматка караганда, Түркиянын президенти Режеп Тайып Эрдоган түрк маалымат каражаттарына берген маегинде Сириянын лидери Башар Асадды сүйлөшүүгө чакырарын билдирген.

"Биз чакыруубузду жеткиребиз. Муну менен эки өлкө ортосундагы карым-катнаштарды мурунку калыбына келтирүүнү каалайбыз", - деген ал.

Ошондой эле Эрдоган Анкара менен Дамасктын сүйлөшүүсүнө Орусиянын президенти Владимир Путин менен Ирактын премьер-министри Мохаммед Шиа Аль-Судани себепчи боло аларын айткан.

Буга чейин июнь айында Эрдоган мамилени калыбына келтирүү үчүн Асад менен жолугушууну көздөп жатканын моюнга алган. Ал арада Сириянын бийлик өкүлдөрү сүйлөшүүлөр Түркия өлкөнүн түндүк-батышындагы козголоңчулар көзөмөлдөгөн аймактан миңдеген аскерлерин чыгарып кетүүгө макул болгондон кийин гана башталарын айтышкан.

Эки өлкөнүн мамилеси 2011-жылы Сирияда жарандык согуш чыгып, анда Анкара Асадды кулатууну көздөгөн козголоңчуларды колдогондон кийин үзүлгөн.