Бишкекте мыйзамсыз иштеп жаткан балдардын эки диний лагери жабылды

Бишкекте мыйзамсыз иштеп жаткан балдардын эки диний лагери жабылды. Бул тууралуу бүгүн, 11-июлда УКМКнын басма сөз кызматынан билдирди.

Маалыматка ылайык, Дин иштери боюнча мамлекеттик комиссиянын каттоосунан өтпөй иштеп жаткан диний лагерлерде 6-17 жаштагы 110 баланын (балдар жана кыздар) билим алып жатканы аныкталган.

"Жашыруун лагерлердин уюштуруучусу 1992-жылы Тажикстанда туулган А.А. болгон, жарандыгы кыргыз", - деп айтылат маалыматта.

Комиссиялык текшерүүнүн жүрүшүндө лагерлерде санитардык-эпидемиологиялык нормалар сакталбаганы, билим берүү программалары да бузулганы аныкталган.

Учурда диний лагерлердин ишмердүүлүгү токтотулуп, иликтөө иштери жүрүп жатат. Тергөө аяктагандан кийин уюштуруучулардын аракеттерине укуктук баа берилери айтылды.