Чуңкурчактагы окуя: Акыйкатчы аттракциондорго байланыштуу токтомду өзгөртүүнү сунуштады  

Чуңкурчактагы эс алуу жайында адам өмүрү кыйылган окуяга байланыштуу акыйкатчы Жамиля Жаманбаева жарандардын коопсуздугуна көңүл бурууга чакырып, Министрлер кабинетине кат жолдоду. Бул тууралуу бүгүн, 16-июлда Акыйкатчы институтунан билдиришти.

Маалымдалгандай, акыйкатчы Министрлер кабинетинин 2024-жылдын 12-апрелиндеги №171 токтому менен бекитилген "Аттракциондорду коопсуз иштетүү" эрежелерине өзгөртүүлөрдү жана толуктоолорду киргизүүнү өтүнгөн.

"Акыйкатчы институту тиешелүү ченемдик укуктук актыларды изилдеп чыгып, жарандардын өмүрүнө коркунуч жараткан аттракциондордун ишмердүүлүгү үчүн тийиштүү коопсуз шарттарды камсыз кылуу зарылдыгына токтолду. "Банжи-жампингди” аттракциондун механикалаштырылбаган түрү катары тизмеге киргизүүнү сунуштайт", - деп айтылат маалыматта.

Эске салсак, 6-июль күнү Чуңкурчак капчыгайында бийиктиктен секирген эркек киши арканы үзүлүп кетип каза болгон.