Ошто өч алууну көздөп таанышын ичке сайган шектүү кармалды

Ош шаарынын 19 жаштагы тургунуна оор жаракат келтирген шектүү кармалды. Бул тууралуу шаардык милиция билдирди.

Маалыматка ылайык, 6-июлда 2005-жылы туулган А.уулу А.ны мурунтан тааныш болуп жүргөн Ариет аттуу жаран телефон чалып, кездешүүгө чакырган. Ал барганда таанышы атайылап ичке бычак менен сайып салган.

Бул факты боюнча Кылмыш-жаза кодексинин 130-беренесинин (Ден соолукка оор залал келтирүү) негизинде кылмыш иши козголгон.

Шектүү катары 2005-жылы туулган К.А. аттуу жаран кармалып, Ош шаардык сотунун чечими менен камакка алынган.

"Тергөөдө шектүү жабырлануучу экөөнүн пикири мурдатан бери келишпей жүрүшкөндүгүн билдирип, өч алуу үчүн ушул ишке барганын айткан", - деп айтылат маалыматта.