Сүйүнчү! Үзүр Жусупбеков Кыргызстанга төртүнчү Олимпиада медалын алып келди

Кыргыз балбаны Үзүр Жусупбеков Париж шаарында өтүп жаткан Жайкы Олимпиада оюндарында 97 килограмм салмакта коло байге утту.

Ал коло байге үчүн беттеште египеттик Мохаммед Габр аттуу балбан менен кез келди.

Кыл чайнашкан беттеш 1:1 эсебинде аяктады. Кыргыз балбаны акыркы болуп балл алгандыгы үчүн жеңүүчү болду. Буга макул болбогон египеттик машыктыруучу "челленж" баскычын басты, калыстар кайра видео кайталоону карап, Үзүр Жусупбековго дагы 1 упай кошту.

Жыйынтыгында Үзүр Жусупбеков 2:1 эсебинде жеңишке жетти.

Муну менен Үзүр Жусупбеков Кыргызстанга төртүнчү Олимпиада медалын алып келди. Кыргызстан буга чейин эч бир Олимпиадада төрт медаль уткан эмес. Бул дагы тарыхый көрсөткүч.