Тамчыга кулаган аппарат: УКМК эмне кулап түшкөнүн айтты

Тамчыдагы аэропортко жакын жерге жаңы типтеги тактикалык мини-дрон кулаган. Бул тууралуу УКМК кабарлады.

Андагы маалыматка ылайык, бүгүн, 14-августта Балыкчы шаарындагы машыгуу полигонунун аймагында жаңы типтеги тактикалык мини-дрондун машыгуу сыноолору өткөрүлгөн. Анда Тамчыдагы аэропортко конушу керек болгон дрон белгиленген чекке жетпей кулап түшкөн. Андан эч ким жабыркаган эмес.

"Учурда аэропорттун аймагын мини-дрондун бузулган бөлүктөрүнөн тазалоо иштери жүрүп жатат. Сыноочулар тобу анын себептерин иликтешет", - деп билдиришти УКМКдан.

УКМК ошондой эле Bayraktar баш болгон учкучсуз аппараттар зыянга учурабаганын кошумчалады.

Бүгүн социалдык тармактарда Тамчыдагы аэропортко жакын жерге учуучу аппарат кулап түшүп, өрттөнүп жаткан видеосу тараган.