Жеки Чан Паралимпиада оюндарынын ачылыш аземинде Олимпиада отунун факелин алып барат

Белгилүү кытайлык актёр Жеки Чан 28-августта Париж шаарында өтө турган XVII Жайкы Паралимпиада оюндарынын ачылыш аземине катышат. Бул тууралуу чет элдик басылмалар жазды.

Андагы маалыматка караганда, ал Олимпиада отунун факелин алып баруучулардын бири болот. Эстафетаны Жеки Чан жергиликтүү убакыт боюнча саат 17:27де алат. Ал эми ачылыш аземи саат 20:00дө башталат.

Белгилей кетсек, Жайкы XVII Паралимпиада оюндарында жалпы 22 спорттун түрү боюнча 549 медаль ойнотулат. Кыргызстандын атынан төрт спортчу өлкө намысын коргойт.

Паралимпиада оюндары 28-августта башталып, 8-сентябрда аяктайт.