Орусияда дагы бир жогорку даражалуу аскер адамы кармалды

Орусиянын Коргоо министринин мурдагы орун басары Павел Попов алдамчылык боюнча айыпталып кармалды. Бул тууралуу Mash телеграм каналы жазды.

Иш "Патриот" паркындагы уурулук фактысына байланыштуу. Жай айынын башында Попов кызматынан бошотулган. Ага чейин 11 жыл Коргоо министринин орун басары болуп иштеген. Тергөө Попов директор Вячеслав Ахмедов жана Коргоо министрлигинин Инновациялык өнүктүрүү боюнча башкы башкармалыгынын жетекчисинин орун басары Владимир Шестеров менен бирге «Патриот» паркынын эсебинен байыган деп эсептеп жатат. Уурдалган каражаттын суммасы жарым миллиард рублдан ашык.

Чиновник Красногорск аймагындагы өз участкасында казынанын эсебинен курулуш-оңдоо иштерин жүргүзгөнү, ошондой эле батирлерин оңдоодон өткөргөнү аныкталган.

Учурда ал кармалып, тергөө иштери башталды.