Орусияда дагы бир жогорку даражалуу аскер адамы кармалды

Орусияда Ленинград аскер округунун командиринин материалдык-техникалык камсыздоо боюнча орун басары, генерал-майор Валерий Муминжанов кармалды. Бул тууралуу Орусиянын Тергөө комитети билдирди.

Ал өзгөчө ири өлчөмдө пара алган деп шектелүүдө. Тергөөнүн версиясы боюнча, Муминжанов Коргоо министрлигинин ресурстук камсыздоо башкармалыгынын начальниги кызматын ээлеп турганда Куралдуу күчтөрдү кийим-кече менен камсыздоого жооптуу болуп, 1 жарым миллиард рублга формаларды алып келүү боюнча келишим түзүүгө көмөктөшкөн. Бул үчүн ал 20 миллион рублдан ашык акча алган.

Тергөөчүлөр аныктагандай, Муминжанов жана анын үй-бүлө мүчөлөрүнүн Москва менен Воронежде 120 миллион рублдан ашык кыймылсыз мүлкү бар. Алардын алынышынын мыйзамдуулугу текшерилүүдө.

Бул Орусияда жогорку даражалуу аскер кызматкерлеринин кармалышынын алгачкысы эмес. Буга чейин Сергей Шойгунун үч мурдагы орун басары кармалган: Дмитрий Булгаков коррупцияга айыпталууда, Тимур Иванов 1,2 миллиард рубль пара алганга шектелүүдө, Павел Попов алдамчылык боюнча айыпталууда.

Мындан тышкары бир нече жогорку даражалуу аскер кызматкерлери кармалган.