Мушкер Конор Макгрегор Ирландиянын президенттигине талапкерлигин коймой болду

Атактуу UFC мушкери Конор Макгрегор Ирландияда боло турган президенттик шайлоодо талапкерлигин коё тургандыгын билдирди. Бул тууралуу ал социалдык тармактагы баракчасына жазды.

"Мен муну мурда да айткам, азыр дагы айтам, эмгекчил элдин байлыгын тоногондордон, алдамчылардан, чакан ишканаларды ээлеп алган жана башкалардан Ирландиянын эли үчүн жоопторду талап кылам!", - деп жазды мушкер.

Макгрегор президент болуп шайланып калса, керек болсо парламенттин төмөнкү палатасын таркатууну убада кылууда.

"Ирландияга элдин кызыкчылыгына толук берилген активдүү президент керек. Бул менмин. Мен жалгыз логикалык тандоомун. 2025-жылга аз калды", - деп кошумчалаган ал.

Ирландиянын азыркы президенти 83 жаштагы Майкл Хиггинс. Ал эки жолу шайлоодо жеңишке жетишкен: 2011 жана 2018-жылдары. Ирландиянын конституциясына ылайык, бир жаран эки мөөнөттөн ашык президент боло албайт. Ирландиядагы кийинки президенттик шайлоо 2025-жылы өтөт.