Токаев Көчмөндөр оюндары үчүн кыргыз элине ыраазычылыгын айтты

Коңшу Казакстандын президенти Касым-Жомарт Токаев Астана шаарында башталган Дүйнөлүк көчмөндөр оюндарынын ачылышында сөз сүйлөп жатып бул оюндар үчүн кыргыз элине ыраазычылыгын айтты.

Токаев көчмөндөр оюндары – бул баа жеткис мурастарды жаш муундарга өткөрүп берүү үчүн жаралган өзгөчө долбоор экенин баса белгиледи.

"Мындан 10 жыл мурун биринчи жолу бул мелдештерди уюштурган кыргыз боордошторубузга ыраазычылык билдиребиз. Бул улуттук спорттун түрлөрү боюнча дүйнөдөгү эң чоң мелдештер, көчмөндөрдүн олимпиадасы десек болот.

Бул оюндар көчмөндөр цивилизациясын дүйнөлүк деңгээлде жайылтат. Спорт – бул өз ара урматтоонун жана тилектештиктин символу. Спорттун негизги миссиясы – элдердин достугун чыңдоо", - деди Токаев.

Кыргызстан Көчмөндөр оюндарынын негиздөөчүсү. Эң алгач бул оюндар 2014-жылы Чолпон-Атада өткөн. 2016 жана 2018-жылдары кайрадан Кыргызстанда, ал эми 2022-жылы Түркияда өткөн. 2026-жылы Өзбекстанда өтө турган болду.