Рак илдетине чалдыккан Кейт Миддлтон билдирүү таратты  

Рак илдетине чалдыккан Уэльс ханбийкеси Кейт Миддлтон тогуз ай оору менен алп урушуп, химиотерапияны аяктаганын жарыялады. Бул туурасында чет элдик басылмалар жазышты.

Кейт өз билдирүүсүндө “акыры химиотерапияны бүтүрүү кандай жеңилдик экенин сөз менен жеткире албайм” деп калтырган.

Уэльс ханбийкеси оорунун кайра кайталанышына жол бербөө үчүн бардыгын жасап жатканын кошумчалаган. Ошондой эле химиотерапия аяктаганы менен толук айыгуунун жолу узакка созула тургандыгын белгилеген.

Белгилей кетсек, Кейт Миддлтон рак илдетине чалдыккандан кийин алгачкы жолу июнь айынын ортосунда эл алдына чыккан. Анда ханбийке королдук үй-бүлөнүн башка мүчөлөрү менен парадга катышкан. Экинчи ирет июль айында спорттук мелдешке кызы Шарлотта менен келип, катышып кеткен.