Орусия репрессиянын курмандыктарын реабилитациялоо маселесин кайра карап чыгат

Орусиянын башкы прокурору Игорь Краснов саясий репрессиянын курмандыктарын реабилитациялоо боюнча айрым чечимдерди кайра кароо боюнча буйруктун долбоорун даярдады. Бул тууралуу чет элдик басылмалар жазды.

Маалыматка караганда, демилге Орусиянын премьер-министри Михаил Мишустин тарабынан үстүбүздөгү жылдын июнь айында киргизилген Саясий репрессиянын курмандыктарынын элесин түбөлүккө калтыруу боюнча мамлекеттик саясаттын концепциясына жакында киргизилген өзгөртүүлөргө байланыштуу.

Буйруктун долбооруна ылайык, оор кылмыштарга, аскердик кылмыштарга жана адамзатка каршы кылмыштарга күнөөлүү адамдарды реабилитациялоо боюнча чечимдерди аныктоо жана жокко чыгаруу боюнча иштерди туруктуу негизде уюштуруу пландалууда.

Документте “нацисттик кызматташтарды жана Мекенге чыккынчылык кылгандарды актоого жол бербестен, тарыхый адилеттүүлүктү жана саясий репрессиянын курмандыктарынын укуктарын калыбына келтирүү” зарылчылыгы баса белгиленет.

Чет элдик жарандарды реабилитациялоо боюнча чечимдерди жокко чыгаруу тууралуу маалымат Орусиянын Тышкы иштер министрлиги аркылуу башка өлкөлөрдүн бийликтерине берилет. Буйрук долбоорунда ошондой эле орусиялык ЖМКлар прокуратуранын ишин «тарыхый чындыкты коргоону камсыздоонун конституциялык принцибинин негизинде» чагылдыруусу сунушталат.

Буйруктун кабыл алынышына саясий репрессиянын курмандыктарынын элесин түбөлүккө калтыруу концепциясын өзгөртүү себеп болгон. Орус өкмөтү ушул жылдын 20-июнунда саясий репрессиянын курмандыктарынын концепциясын өзгөрттү.