Көчмөндөр оюндары: Өлкө капчыгына кимдер медаль алып келишти? (тизме)

Астана шаарында өтүп жаткан V Дүйнөлүк көчмөндөр оюндарында кыргыз курамасы 3 алтын, 7 күмүш, 4 коло медаль алып, командалык эсепте 2-орунда келе жатат.

Спорт департаментинин маалыматына ылайык, таяк тартыш боюнча Уланбек Турганбаев (65 килограмм) менен Эльза Абдыкадырова (55 килограмм) алтын, Бекмурза Токтошев (70 килограмм) менен Элдос Айтбаев (80 кг) күмүш байге жеңди.

Өзбек күрөшүнөн (кураш) Бекболот Токтогонов (+100 кг) алтын, Ажар Исаева (70 кг) коло байгеге ээ болду. Казак күрөшүнөн Кемал Оболбеков (55 кг) менен Луиза Асакеева (48кг) күмүш, Байбол Саламат уулу (66 кг) коло байге тагынды.

Эр эңиште Жекшенбек Турдубеков (60 кг) менен Райкан Бактыгул уулу (70 кг) күмүш, Калыбек Бусурманкул уулу (80 кг) коло байгеге ээ болду. Салттуу жаа атуу боюнча Асел Садырова күмүш, Искак Токонов коло медаль тагынды.

Белгилей кетсек, 8-сентябрда башталган V Дүйнөлүк көчмөндөр оюндары 13-сентябрга чейин уланат.