Орусиянын Коргоо министрлиги тогуз аймакта 144 учкучсуз учак атып түшүрүлгөндүгүн айтты

10-сентябрга караган түнү абадан коргонуу күчтөрү Орусиянын тогуз аймагында 144 учкучсуз учакты атып түшүргөн. Бул туурасында орус басылмалары жазышты.

Дрондордун көбү Брянск облусунда, аймакта 72 учкучсуз аппарат атып түшүрүлгөн. Дагы 20 учкучсуз учак Москва облусунун үстүнөн атылган. Ал эми калганы Курск, Тула, Белгород, Калуга, Воронеж сыяктуу бир катар аймактарда катталган.

Москва облусунда учкучсуз учуучу аппараттардын кол салуусунан бир аял каза болуп, кеминде үч киши жаракат алган. "Домодедово", "Внуково" жана "Жуковский" аэропорттору убактылуу ишин токтотконун жергиликтүү бийлик билдирди.

Ошондой эле учкучсуз учактын сыныктарынан улам Москва шаарындагы Каширское шоссесинде унаа кыймылы токтотулган. Тула облусунда отун-энергетика комплексинин объектилеринин бирине учактын калдыктары түшүп, эч ким жабыркаган жок.

Брянск, Воронеж, Калуга жана Липецк облустарында да жабыркагандар жок экендиги маалыматта белгиленген.