Камала Харрис Трампты өлкөнү Кытайга саткан деп айыптады

АКШнын ABC News телеканалы кечээ, 10-сентябрь күнү кечинде президенттикке талапкерлер Дональд Трамп менен Камала Харристин катышуусунда дебаттын биринчи айлампасын өткөрдү.

90 мүнөт бою президенттикке талапкерлер телеканалдын алып баруучуларынын суроолоруна жооп беришти. Учурдагы дебат 5-ноябрдагы шайлоо алдындагы президенттик жарыштагы маанилүү учур. Улуттук сурамжылоолор көрсөткөндөй, талапкерлердин ортосундагы ажырым дагы эле өтө тар. Дебат башталганга чейин Трамп менен Харрис дээрлик бир убакта трибунага чыгышты, Демократиялык партиянын талапкери биринчи болуп атаандашына колун сунду.

Талкуунун жүрүшүндө Харрис өзүнүн атаандашын Кытайга чиптерди жеткирүүгө жардам бергенин айтып, муну өлкөнү Кытайга сатуу деп атады.

"Трамп президент болуп турганда Кытайга алардын армиясын жакшыртууга жана модернизациялоого жардам бере турган америкалык чиптерди саткан. Муну менен ал бизди Кытайга сатты", - деди АКШнын вице-президенти.

Өз кезегинде Трамп эгер Харрис жеңсе, өлкө эч кандай ийгиликке жете албай тургандыгын айтты.

"Ал биздин өлкөнү талкалайт. Эгер ал президент болуп калса, биздин өлкөнүн ийгиликке жетүү мүмкүнчүлүгү болбойт. Ийгиликти биякка коёлу, Харрис президент болсо өлкөбүз Венесуэлага айланат", - деди Трамп.

Белгилей кетсек, АКШда президенттик шайлоо 5-ноябрда өтөт. Дональд Трамп расмий түрдө Республикалык партиядан мамлекет башчылыгына көрсөтүлгөн. Учурдагы вице-президент Камала Харрис демократ катары шайлоого катышат.