Яги тайфуну Кыргызстандын тайпасындагы оюнду үзгүлтүккө учуратты

Түндүк Корея менен Катар курама командаларынын 2026-жылы өтүүчү Дүйнө чемпиондугуна тандоо оюндары “Яги” тайфунунан улам үзгүлтүккө учурады.

Бул оюнда Түндүк Корея курамасы үй ээси катары талаага чыкты. Оюн Лаостун борбору Вьентьян шаарында өттү. Оюн башталганда нөшөрлөгөн жаан жаап, жыйынтыгында беттеш 20 мүнөткө токтоду.

Андан кийин оюнчулар талаага кайтып келип, беттешти жыйынтыктоого жетишишти.

Оюндун өзү 2:2 эсебинде тең чыгуу менен аяктады. Түндүк Корея курамасы Кук Чхоль Чан оюндан четтетилгенден кийин 28-мүнөттөн баштап бир оюнчуга аз ойношту.

Белгилей кетсек, Яги тайфуну Түштүк-Чыгыш Азия өлкөлөрүн каптап жатат. Тайфун кыйроолорго жана адамдардын өлүмүнө алып келүүдө.

Түндүк Корея менен Катар курама командалары Дүйнө чемпиондугуна тандап алууда Кыргызстан менен бир тайпага жайгашкан.