"Эң өзгөчө туулган күнүм быйылкысы". Ырчы Алмаз Шаадаев 34 жашка толду

Бүгүн, 11-сентябрда ырчы Алмаз Шаадаев туулган. Ал бул жылы 34 жашка толду. SUPER.KG порталы ырчы мырзага туулган күнү менен куттуктап байланышка чыкканда, эң өзгөчө туулган күнү быйыл болуп жатканын айтып өттү.

"Туулган күндүк маанай эң сонун. Мен азыр туулган жерим Нарында жүрөм. Быйылкы туулган күнүмдү эң өзгөчө, жагымдуу туулган күн дейт элем. Себеби кызым менен тосуп жатам. Учурда кызымдын жытына балкып, ата-энемдин, үй-бүлөмдүн жанында бактылуу болуп турган кезим. Мындан өткөн бакыт жок болсо керек.

Негизи жаш өткөн сайын тынчтыкты каалап калат экенсиң. Мен дагы ызы-чуудан алыстап, айылда жүргөн кезим. Жаш кезде достор менен отуруп белгилейт элем. Бул жолу үй-бүлөм менен айылда тосуп жатам. Менин эң эсимде калган туулган күнүм ушул болот болуш керек", - деди Шаадаев.

Алмаз Шаадаев 1990-жылдын 11-сентябрында Нарын облусунун Ат-Башы районунда туулган.

Чоң сахнага "Супер-Инфо" гезити тарабынан уюштурулган “Жылдын суперлери-2010” концертинде “Жаным, ай” аттуу ырын ырдап чыккан. Алмаз Шаадаев Кыргыз-Түрк "Манас" университетинин туризм-саякат бөлүмүн аяктаган.

Ырчы "Фаридам", "Жубайым", "Сен дегенде", "Арзуу", "Көлдүк кыз" жана башка популярдуу ырлардын аткаруучусу. Үй-бүлөдө 4 бир туугандын улуусу.