Түрк дүйнөсүнүн өлкөлөрү бирдиктүү латын алфавитине өтүүнү макулдашты 

Түрк дүйнөсүнүн өлкөлөрүнүн өкүлдөрү Бакуда өткөн жыйында 34 тамгадан турган латын алфавитине негизделген бирдиктүү алфавитти макулдашты.

Түрк академиясынын маалыматына караганда, 9-11-сентябрда Азербайжандын борборунда Түрк мамлекеттери уюму тарабынан түзүлгөн түрк дүйнөсүнүн бирдиктүү алфавити боюнча комиссиянын үчүнчү жыйыны өттү.

"Комиссия кеңири талкууларды жүргүзүп, алфавиттин долбоорун жакшыртууну талап кылган аспектилерди аныктады. Бул иштин жыйынтыгында 34 тамгадан турган бирдиктүү түрк алфавити боюнча сунуш макулдашылды", - деп айтылат маалыматта.

Сунушталган алфавиттин ар бир тамгасы түрк тилдеринде кездешүүчү түрдүү фонетикалык тыбыштарды билдирери такталган.

Иш-чаранын уюштуруучулары тиешелүү мекемелерди "сунушталган бирдиктүү түрк алфавитин ишке ашырууда эффективдүү колдоо көрсөтүүгө" чакырышты.