Садыр Жапаров Вьетнамдын президентине көңүл айтты 

Өлкө башчы Садыр Жапаров Вьетнамдын президенти То Ламга “Яги” тайфунунун кесепетинен көптөгөн адамдардын курман болгондугуна байланыштуу көңүл айтуу телеграммасын жөнөттү. Бул тууралуу бүгүн, 12-сентябрда президенттин басма сөз кызматынан билдирди.

“Вьетнамда “Яги” тайфун апаатынан көптөгөн адамдар каза болду жана жаракат алды деген суук кабарды терең кайгыруу менен кабыл алдым. Кыргызстандын элинин жана жеке өзүмдүн атымдан каза болгондордун үй-бүлөлөрүнө жана жакындарына аза кайгысын тең бөлүшүп көңүл айтам. Бул каргашалуу окуянын кесепетинен жапа чеккендердин тезирээк сакайып кетүүсүн каалайм”, - деп айтылат телеграммада.

Белгилей кетсек, Вьетнамдын түндүгүндө "Яги" тайфунунан каза болгондордун саны 10-сентябрга карата 87ге жетип, 752 адам жаракат алганы маалым болгон. Курмандыктардын саны дагы да көбөйүшү мүмкүн.