Казакстанда эң узун тоннель унаа кыймылы үчүн ачылды

Бүгүн, 12-сентябрда Казакстандын Түркстан облусунда өлкөнүн эң узун автотранспорттук тоннели аркылуу кыймыл ачылды. Бул туурасында казак басылмалары өлкөнүн Транспорт министрлигине шилтеме берүү аркылуу жазышты.

Маалымдалгандай, Шакпак Баба ашуусундагы эки жолдуу тоннелдин узундугу 840 метр, туурасы 11 метр, бийиктиги 8 метр.

“Тоннель “Батыш Европа – Батыш Кытай” эл аралык транспорт коридорунун бир бөлүгү болуп саналат. Ошондой эле кышында кар көп түшүп, кыймылга тоскоол болгон катаал аймактагы унаа агымын камсыздайт.

Негизги транспорт агымы Шакпак-Баба конушун айланып өтүүгө багытталат, бул айылдагы коопсуздукту күчөтөт”, - деп белгилеген Транспорт министрлиги.