Баткенде издөөгө алынган дагы бир жаран Бишкектен кармалды

Баткенде алдамчылык фактысы менен издөөдө жүргөн жаран Бишкектен кармалды. Бул тууралуу бүгүн, 17-сентябрда облустук милициядан билдирди.

Маалыматка ылайык, Кадамжай районунун Исхак-Полотхан айыл аймагынын 27 жаштагы тургуну “Баяман баатыр” базарынан 1 миллион сомдук буюмун А. аттуу жаран алып кетип, кайра бербей койгонун айтып, милицияга арыз менен кайрылган.

Бул факты боюнча Кылмыш-жаза кодексинин 209-беренеси (Алдамчылык) менен кылмыш иши козголгон.

Ыкчам иликтөө иштеринин жүрүшүндө, шектүү катары Жалал-Абад облусунун Сузак районунун 29 жаштагы тургуну А.А. Бишкектен кармалып, Баткенге жеткирилди.

Учурда тергөө иштери уланууда.

Кошумчалай кетсек, бүгүн Баткенде бир нече алдамчылык фактысына шектелип изделип жаткан курулуш компаниянын директору Бишкектен кармалганы кабарланган.

Анын алдында эле Баткенде соттун өкүмүн аткарбай качып жүргөн дагы бир жаран Бишкек шаарынан кармалганы маалымдалган.