УКМК Бишкекте эки милиция кызматкерин кармады

Бишкекте эки милиция кызматкери калаа тургунун мыйзамсыз кармап, кыйноого алган деген шек менен кармалды. Бул тууралуу бүгүн, 23-сентябрда УКМКдан билдирди.

Маалыматка ылайык, Биринчи май РИИБинин 5-шаардык милиция бөлүмүнүн ыкчам кызматкерлери Ж.у.К. жана А.Ы. кармалып, УКМКнын убактылуу кармоочу жайына киргизилди.

Алар 18-сентябрда Э.Б. аттуу жаранды мыйзамсыз кармоо жана кыйноо фактысы боюнча козголгон кылмыш ишинин алкагында кармалышты.

"Соттук-психиатриялык экспертизанын жыйынтыгында Э.Б.га карата кыйноо колдонулган, бул дене жаракатынын издери менен далилденген. Учурда аталган кылмышка тиешеси бар башка кызматкерлерди аныктоо боюнча тиешелүү тергөө-ыкчам иш-чаралары жүргүзүлүүдө", - деп айтылат маалыматта.