Дагы бир дүйнөгө белгилүү футболчу карьерасын жыйынтыктады

"Барселонанын" жана Испания курама командасынын мурдагы жарым коргоочусу Андрес Иньеста 40 жашында профессионалдык карьерасын аяктаганын жарыялады. Бул тууралуу футболчу социалдык тармактагы баракчасында билдирди.

Белгилүү жарым коргоочунун карьерасындагы акыркы клубу Бириккен Араб Эмираттарынын "Эмирейтс" клубу болуп калды.

"Барселона" менен Андрес Иньеста тогуз жолу Испания чемпиондугун жана төрт жолу УЕФАнын Чемпиондор Лигасынын утуп алган.

2010-жылы Иньеста Түштүк Африкада өткөн Дүйнө чемпиондугунда Испания курамасы менен чемпион болгон. Финалда ал Нидерланды курамасына жеңиш голун киргизген.

Андрес Иньеста – легендарлуу испаниялык футболчу, футбол тарыхындагы эң мыкты жарым коргоочулардын бири катары белгилүү. Ал өзүнүн карьерасынын көбүн "Барселонада" өткөрдү, ал жерде өзүнүн техникалык оюнунун стили, мыкты координациясы жана мыкты пас берүүсү менен клубдун символуна айланган.