Рамзан Кадыровдун уулу чеченстандык мушкерлерге акыркы эскертүүсүн берди

Чеченстандын башчысы Рамзан Кадыровдун уулу, республиканын спорт министри Ахмат Кадыров ММАга катышып жүргөн Чеченстандын мушкерлерине кайрылып, өз элин уят кылбоого чакырды. Бул тууралуу ал өзүнүн Телеграм каналында билдирди.

"Сиздердин рингдин ичиндеги жана тышындагы иш-аракеттериңиздер, жүрүм-турумуңуздар элибиздин абийирине, биз карманган ишенимге доо кетирип жатат. Бүгүнкү күндө, тилекке каршы, айрымдарыңардын басма сөз жыйындарда, эл алдына чыгып сүйлөгөндө аша чаап кеткениңерди көрүп жатабыз. Ыплас сөздөрүңөр, уятсыз сөздөрүңөр жана жүрүм-турумуңар өзүңөрдү гана басынтпастан, бүтүндөй чечен элин, бүтүндөй мусулман коомчулугун шерменде кылып жатат", - деди ал.

Ал ошондой эле чеченстандык ММА мушкерлерине акыркы эскертүүсүн берди.

"Бул акыркы эскертүү. ММА боюнча мындай иш-аракеттериңерди токтоткула, анткени алар биздин салттарга жана баалуулуктарга карама-каршы келет. Болбосо конкреттүү чаралар көрүлөт. Бул жүрүм-турумга мындан ары чыдай албайбыз”, – деп эскертти Кадыров.

Ал мушкерлерге кандай чара көрүлөрүн тактаган жок.

Ахмат Кадыров 18 жашта. Ушул жылдын февраль айында ал Чеченстандын жаштар иштери боюнча министри болуп дайындалса, 21-майда республиканын дене тарбия жана спорт министри болуп дайындалган.