Румынияда фурага 28 мигрантты жүктөп алганы үчүн издөө жарыяланган жаран Бишкектен кармалды

Европага мыйзамсыз мигранттарды ташуу менен алектенген чет элдик жаран “Манас” аэропортунан кармалды. Бул тууралуу ИИМ кабарлады.

ИИМдин жана УКМКнын кызматкерлери мамлекеттик чек араны кесип өтүүгө аракет кылган учурда Интерпол линиясы боюнча издөөдө жүргөн 1978-жылы туулган Ф.С. аттуу чет элдик жаранды "Манас" эл аралык аэропортунан кармашкан.

"Бул жаран Румыниянын Кылмыш-жаза кодексинин 263-беренеси, 1 жана 2-пункту боюнча мигранттарды Европага мыйзамсыз ташууну уюштурганы үчүн айыпталууда. Маалыматка ылайык, 2020-жылдын 20-ноябрында Румыниядан чыгып бара жаткан «Нэдлак II-Чанадпалота» көзөмөл-өткөрүү жайында Ф.С. айдап бараткан жүк ташуучу унаа токтотулган. Унааны текшерүү учурунда Румыниянын чек ара полициясынын кызматкерлери жүк сактоочу жайдан Румыниянын мамлекеттик чек арасынан Европаны көздөй мыйзамсыз өтүүгө аракет кылган Араб тектүү 28 чет элдик жаранды табышкан.

Кармоо Интерполдун кызыл билдирүүсү (экстрадиция, экстрадиция же ушуга окшогон соттук аракеттерди күтүп жаткан адамды табуу жана убактылуу камакка алуу боюнча бүткүл дүйнө боюнча укук коргоо органдарына кайрылуу) жарыялангандан кийин болгон", - деп билдиришти ИИМден.

Кармалган жаран Сокулук РИИБинин тергөө кызматына жеткирилди.