Кыргыз волейболчулары Өзбекстандагы турнирде чемпион болушту

Волейбол боюнча Кыргыз улуттук курама командасы коңшу Өзбекстандын Ташкент шаарында өткөн Азия зоналдык чемпионатында жеңүүчү аталды.

18-24-октябрь күндөрү Ташкентте 6 команданын катышуусунда Борбор Азия волейбол ассоциациясынын (CAVA) чемпионаты өттү.

Тайпалык баскычта командалар бири-бири менен өз ара ойношту. Кыргызстан курамасы 5 беттеште тең жеңишке жетип, мүмкүн болгон 15 упайдын 14 упайына ээ болду.

Жыйынтыгында Кыргыз курамасы финалга чыгып, финалда Өзбекстан менен кез келди. Бүгүн, 24-октябрда өткөн финалдык оюн 3:0 эсебинде Кыргызстандын пайдасында аяктады.

Жыйынтыгында Азия зоналдык чемпионатында Кыргызстан биринчи орунду алса, Өзбекстан экинчи жана Түркмөнстан үчүнчү орунга ээ болду.